नागरिकको स्वास्थ्य सेवाप्रतिको अधिकारलाई सम्मान गर्दै सुरक्षित, जनमुखी र गुणस्तरीय उपचारात्मक सेवा प्रदान गर्नु हाम्रो मुख्य ध्येय हो। हामी २४ सै घण्टा आकस्मिक सेवा, शल्यकृया सेवा,  प्रसूति सेवा र विशेषज्ञ चिकित्सा सेवाहरू न्यूनतम शुल्कमा उपलब्ध गराउन प्रतिबद्ध छौँ। अस्पतालको सेवामा डिजिटल प्रणाली (Digital Health) र सुशासन प्रवर्द्धन गर्दै बिरामीको सन्तुष्टिलाई नै हामी प्राथमिक महत्व दिन्छौँ। साथै, समुदायस्तरमा प्रतिकारात्मक स्वास्थ्य चेतना फैलाएर स्वास्थ्य क्षेत्रमा सार्वजनिक उत्तरदायित्व वहन गर्न हामी निरन्तर क्रियाशील रहनेछौँ।

• मातृ तथा स्त्रीरोग शल्यक्रियाको सुदृढीकरण: अस्पतालको मुख्य सबल पक्षको रूपमा रहेको प्रसूति तथा स्त्रीरोग सम्बन्धी शल्यक्रियाहरूलाई अन्तर्राष्ट्रिय मापदण्ड अनुरूप अझ सुरक्षित, आधुनिक र संक्रमणरहित बनाई गुणस्तरीय शल्यक्रिया सेवा सुनिश्चित गर्ने।
• आकस्मिक प्रसूति तथा नवजात शिशु स्याहार कार्यक्रमको प्रभावकारी सञ्चालन: जटिल प्रकृतिका गर्भवती, सुत्केरी महिला र नवजात शिशुहरूको ज्यान जोगाउन चौबीसै घण्टा विस्तृत आकस्मिक प्रसूति तथा नवजात शिशु स्याहार सेवालाई उच्च प्राथमिकताका साथ थप प्रभावकारी र साधन-स्रोत सम्पन्न बनाउने।
• सघन र नवजात शिशु उपचारको ग्यारेन्टी: जटिल शल्यक्रिया पश्चात्का बिरामी र गम्भीर अवस्थाका नवजात शिशुहरूको जीवन रक्षाका लागि अत्याधुनिक ICU / HDU तथा NICU / SNCU सेवालाई उच्च प्रविधियुक्त उपकरण र दक्ष जनशक्तिसहित २४ सै घण्टा तयारी अवस्थामा राख्ने।
• विशिष्टीकृत शल्यक्रिया तथा अर्थोपेडिक सेवा विस्तार: राजमार्ग र आसपासका क्षेत्रमा हुने दुर्घटनाका घाइते तथा जटिल बिरामीहरूका लागि आधुनिक मोड्युलर अप्रेशन थियटर (Modular OT) मार्फत हाडजोर्नी तथा नशा रोग र जनरल सर्जरी सेवालाई निरन्तर विस्तार गर्ने।
• लैङ्गिक हिंसा प्रभावितका लागि एकीकृत सेवा: हिंसामा परेका महिला, बालबालिका तथा ज्येष्ठ नागरिकहरूलाई एकै स्थानबाट स्वास्थ्य उपचार, कानुनी सहायता, मनोपरामर्श र सुरक्षा सुनिश्चित गर्न अस्पताल आधारित लैङ्गिक हिंसा व्यवस्थापन केन्द्र (OCMC) लाई अझ बढी संवेदनशील र प्रभावकारी बनाउने।
•  नि:शुल्क र सहुलियतपूर्ण उपचारको प्रत्याभूति: गरिब, असहाय, अपाङ्गता भएका व्यक्ति, दलित, महिला स्वास्थ्य स्वयंसेविका र सीमान्तकृत समुदायका बिरामीहरूलाई सहजै नि:शुल्क वा आंशिक छुटमा उपचार दिलाउन सामाजिक सेवा एकाइ (SSU) लाई थप जनमुखी र पारदर्शी रूपमा सञ्चालन गर्ने।
• पूर्ण डिजिटल स्वास्थ्य प्रणाली: बिरामीको दर्ता, चिकित्सा इतिहास, ओपिडी/शैया व्यवस्थापन र बिलिङ प्रक्रियालाई चुस्त बनाउन 'इलेक्ट्रोनिक हेल्थ रेकर्ड' (EHR) प्रणाली लागू गरी कागजरहित (Paperless) अस्पतालको रूपमा रूपान्तरण गर्ने।
• सर्वव्यापी स्वास्थ्य पहुँच र बीमा कार्यक्रम: नेपाल सरकारको सामाजिक स्वास्थ्य बीमा कार्यक्रमलाई नगरस्तरमा शतप्रतिशत प्रभावकारी रूपमा कार्यान्वयन गरी नागरिकलाई उपचारको आर्थिक भारबाट मुक्ति दिलाउने।
• उच्चस्तरीय निदान तथा प्रयोगशाला सेवा: रोगको सटिक र छिटो पहिचानका लागि आधुनिक डिजिटल एक्स-रे, अत्याधुनिक प्रयोगशाला (High-tech Lab), र भिडियो एक्स-रे जस्ता निदान सेवाहरूलाई निरन्तर स्तरोन्नति गर्ने।